लॉकडाऊनच्या बातमीने पुणेकर हादरले; जिल्हाधिकाऱ्यांनी दिले 'हे' स्पष्टीकरण

 लॉकडाऊनचे चटके सोसलेल्या पुणेकरांची शनिवारी पुन्हा एकदा भीतीने गाळण उडाली. पुणे जिल्ह्यात १५ दिवसांसाठी लॉकडाऊन लावण्यात आल्याचा एक व्हिडिओ व्हायरल झाल्याने हा सगळा प्रकार घडला. 

•                                            पुण्यात पुन्हा १५ दिवसांचा लॉकडाऊन लावल्याचा व्हिडिओ व्हायरल.
• व्हिडिओ जुना असल्याचे जिल्हाधिकाऱ्यांनी दिले स्पष्टीकरण.
• लॉकडाऊनबाबत अफवा न पसरवण्याचे केले आवाहन.    पुणे: पुण्यात १५ दिवस लॉकडाऊन लावण्यात आल्याचा दावा करणारा एक व्हिडिओ शनिवारी सोशल मीडियावर व्हायरल झाला आणि एकच खळबळ उडाली. या व्हिडिओमुळे पुणेकरांची चांगलीच भंबेरी उडाली. मात्र, ही निव्वळ अफवा असल्याचे नंतर स्पष्ट झाले आणि सर्वांचाच जीव भांड्यात पडला. व्हिडिओ व्हायरल झाल्यानंतर त्याबाबत संभ्रम वाढू नये म्हणून खुद्द जिल्हाधिकारी डॉ. राजेश देशमुख यांनाच स्पष्टीकरण द्यावे लागले. दरम्यान, अशाप्रकारच्या अफवांवर कुणीही विश्वास ठेवू नये, असे आवाहन जिल्हाधिकाऱ्यांनी केले आहे.  
  
  'पुण्यात सोमवारपासून पुन्हा पंधरा दिवस लॉकडाऊन', असा मथळा असलेला एका मराठी वृत्तवाहिनीचा व्हिडिओ सोशल मीडियावर फिरत होता. त्याची वेळीच गंभीर दखल घेत जिल्हाधिकारी देशमुख यांनी स्पष्टीकरण दिले. हा जुन्या बातमीचा व्हिडिओ कुणीतरी व्हायरल केला आहे. मात्र, सध्यातरी पुणे जिल्ह्यात प्रशासनाने असे कोणतेही आदेश दिलेले नाहीत, असे देशमुख यांनी स्पष्ट केले. हा व्हिडिओ फॉरवर्ड करणाऱ्याचे नाव व मोबाइल क्रमांक तसेच ग्रुपचे नाव (स्क्रीन शॉटसह) पाठवल्यास संबंधितावर योग्य ती कारवाई केली जाईल,
  
  असा इशाराही देशमुख यांनी दिला आहे. कृपया कोणीही अशाप्रकारे अफवा पसरवू नये, असे आवाहनही जिल्हाधिकाऱ्यांनी केले आहे.