कोरोना विषाणू मरेल पण तरुणांच्या डोक्यातला राजकारणाचा विषाणू कधी मरणार?

कोरोना विषाणू मरेल पण तरुणांच्या डोक्यातला राजकारणाचा विषाणू कधी मरणार?

तरुणांनी राजकारणात याव अस नेहमीच म्हटलं जातं कारण तरुण काही तरी करून दाखविण्याचा जोश या वयात बाळगत असतात. समाजाला तरुणांकडून खूप अपेक्षा असतात पण सध्याच्या काळात तरूणांनी राजकारणात येण्यापेक्षा त्यांच्या डोक्यात असलेलं राजकारणाच वेड काढून टाका हे सांगण्याची गरज पडत आहे.

      सध्या महाविद्यालयीन वयातच तरुणांच्या डोक्यात राजकारणाच एवढं वेड लागलं आहे की आपल्या करिअरच्या बाबतीत देखील गंभीर नसल्याचे दिसून येते. तरुणांनी अगोदर आपल्या कमाईचे साधन शोधणे गरजेचे आहे आणि उरलेल्या वेळेत आपल्याला आवड असेलच तर राजकारणापेक्षा समाजकारणात लक्ष घातले पाहिजे पण आजकाल उलट होताना दिसत आहे. फेसबुक किंवा व्हाट्सअप्प यासारख्या सोशल मीडिया च्या माध्यमातून एखाद्या नेत्याला आमचे आधारस्तंभ आमचे नेते आमचे दैवत असे संबोधतात, कुठल्याही प्रकारचा फायदा होत नाही तरी देखील त्यांच्या मागे फिरताना दिसतात याउलट खऱ्या अर्थाने आपले दैवत असलेले आईवडील ज्यांनी आपल्याला जन्म दिला त्यांच्या कडे मात्र बघायला त्यांना फुरसत नसते एवढं राजकारणाच वेड तरुणांना लागलं आहे जे कमी होणे गरजेचे आहे अन्यथा काही करून दाखवणे किंवा काही कमावण्याच्या वयात भरकटत जाऊन आपले भविष्य अंधारात जाईल. यापूर्वी आम्ही पाहिलेले काही अनुभव खूप वाईट आहेत काहीजण या राजकारणापायी वाया गेले तर काहीजण व्यसनाच्या आहारी जाऊन त्यांचे संसार उध्वस्त झालेली आहेत.

        देशावर कोरोनाचा संकटकाळ आहे या महामारी मुळे ज्या समाजिक अडचणी निर्माण झाल्या आहेत त्या सर्व तरुणांनी एकत्र येऊन समाजाला प्रेरित असलेले समाजकार्य करणे, सामाजिक प्रश्न सोडविणे तर दूरच राहते याउलट इथे एखाद्या नेत्याच्या किंवा पक्षाच्या मागे लागत माझा नेता, माझं सरकार किती चांगल किंवा तुझा नेता, तुझं सरकार किती वाईट या विषयावर दिवसभर कुठलाही परिणाम सिद्ध होणार नाही अशी निरर्थक चर्चा करत सोशल मीडियावर दिवस घालत असताना दिसतात. 

       तरुणांनो आपल्या सर्वांना एकच विनंती आहे या राजकारणाच्या व राजकीय पक्षातील नेत्यांच्या मागे आपला वेळ वाया घालवू नका, हे नेते तुमच्याच जीवावर आपली राजकारणाची पोळी भाजून घेतात आणि शेवटी तुमच्या हाती भोपळाच असतो. तुमच्याकडे वेळ आणि इच्छाशक्ती आहे निर्णय घेऊन कामाला लागा पैसे कमवा आणि आपलं भविष्य उज्वल करा. आपला परिवार, आपले आईवडील यांच्याकडे लक्ष द्या त्यांनी तुमच्याकडे पाहून ज्या अपेक्षा जी स्वप्न पाहिलेली आहेत ते पूर्ण करण्यासाठी प्रयत्न करा खाद्याचा कार्यकर्ता बनण्याऐवजी आपल्या घरचा कर्ता घरचा प्रमुख बना कारण आपलं भविष्य आपल्याच हातात आहे ते अस कोणाच्या मागे फिरून आपलं भविष्य अंधारात घालवु नका. काही काळात हा कोरोना जाईल लॉकडाउन संपेल तेव्हा तुम्हाला अनेक संधी उपलब्ध होतील त्यासाठी आत्तापासूनच जिद्दीने कामाला लागा आणि आपलं भविष्य उज्वल करा.             

✍🏻 पत्रकार - विलास येडगे